BISAYA 101

whew naubos bisaya ko sa statement na ito :)


DOKTRINA GLORIA: Kinabuhi Alang sa mga Kriminal Kamatayon Alang sa mga Progresibo.

Giwagtang na ni Gloria Macapagal Arroyo ang silot kamatayon ug ang iyang pagduaw sa Santo Papa mao ang pagsaulog sa kinabuhi, sa pagpakabuhi. Sukawahi kini sa mga panghitabo sa atong nasud. Sa sulod lamang sa unom ka bulan sa pagsulod sa tuig pipila na ka mga mag-uuma, mga katawhan sa media ug mga lumilihok alang sa kalambuan sa mga ordinaryong katwhan ang gipangpatay. Mao ba kini ang gipanghambog ni Gloria nga siya nagdumala ug usa ka pro-life nga administrasyon?

Hunyo 26, usa na usab ka kinabuhi sa usa ka mag uuma ang nahulog sa mga kamot sa mga giingong berdugo. Si Wilfredo Cornea lider diha sa 212 ektarya nga Hacienda Cornea sa Sagay City, Negros Oriental, gipusil diha sa iyang tugkaran. Kini nga panghitabo human lamang sa 61 ka adlaw sa dihang gipatay si Ka Eric Cabanit sa UNORKA Mindanao sa syudad sa Panabo. Mokabat na sa usa ka gatos ang gipangpatay nga mga progresibo ug oposisyon niining tuiga apan susama sa kaso ni Ka Eric wala pa gayud nahatagan ug katin-awan ang tumbok sa pagpamatay, nagpabilin pang gawasnon ang mga nagpasiugda sa mapait nga katapusan niining mga bililhong mga kinabuhi.

Ang katungod sa kinabuhi giila nga usa ka tawhanong katungod nga dili pwede kuhaon bisan ni kinsa man. Katungod nga gipanalipdan sa Unibersal nga Deklarasyon sa Tawhanong Katungod (UDHR) ug ingon man sa International Covenant on the Civil and Political Rights (ICCPR). Obligasyon sa estado ug sa iyang gobyerno nga protektahan kining maong katungod usa na niini pinaagi sa balaod ug sa pagpatuman sa balaod. Subo pamalandungon nga kini wala gayud mapatuman sa kasamtangang liderato, hinoon ang kultura sa pagpanghasi maoy nagpatigbabaw. Ang mga mag uuma nga nakigbisog alang sa hingpit nga pagpatuman sa repormang agraryo padayon nga gipanghuraw.

Ang all out war policy sa administrasyong Arroyo giingon nga usa ka lakang alang sa pagkab-ot sa tunhay nga kalinaw apan kini nakita nga usa lamang ka paghatag katarungan sa mga nahitabong pagpamatay sa kang kinsa man nga nagpadayag sa kapalpakan sa gobyerno. Kung ang katuyoan kalinaw, ihatag ang mga programa alang sa kalambuan sa mga mag-uuma, sa mga mamumuo, sa mga kabus, sa masang Pilipino. Kung dili mahaw-as ang mga kabus sa kalisod, kung magpabilin nga dili respetoon, panalipdan ug ipatuman ang tawhanong katungod sa mga katawhan sa kasamtangang gobyerno dili gayud makab-ot ang katarungan. Kung walay katarungan, walay kalinaw!!!

ANG PAGPAMATAY IHUNONG NA! IPATUMAN ANG HUSTISYA!

Mindanao Farmworkers Development Center (MFDC)

UNORKA Mindanao